ໜ່ວຍພັກກົມກິລາລະດັບສູງ ກະຊວງສຶກສາທິການ ແລະ ກິລາ (ສສກ) ໄດ້ຈັດກອງປະຊຸມໃຫຍ່ຄັ້ງທີ III ຂອງໜ່ວຍພັກກົມ ພ້ອມປ່ອນບັດເລືອກຕັ້ງເອົາຄະນະຊຸດໃໝ່ ຂຶ້ນໃນວັນທີ 8 ຕຸລາ 2024 ທີ່ຫ້ອງປະຊຸມຄະນະກໍາມາທິການໂອແລັມປິກແຫ່ງຊາດລາວ, ໂດຍໃຫ້ກຽດເປັນປະທານຂອງສະຫາຍ ຮສ.ປອ ພຸດ ສິມມາລາວົງ ກຳມະການສູນກາງພັກ, ເລຂາຄະນະບໍລິຫານງານພັກ, ລັດຖະມົນຕີກະຊວງສຶກສາທິການ ແລະ ກິລາ, ມີສະຫາຍ ບຸນມີ ຈັນທະອຸດົມ ປະທານກວດກາຄະນະພັກ, ຫົວໜ້າກົມກວດກາ ແລະ ສະະຫາຍ ແສງພອນ ພົນອາມາດ ເລຂາໜ່ວຍພັກກົມ, ຫົວໜ້າກົມກິລາລະດັບສູງ ກະຊວງສຶກສາທິການ ແລະ ກິລາ, ພ້ອມດ້ວຍຄະນະ ແລະ ສະມະຊິກພັກພາຍໃນໜ່ວຍພັກກົມກິລາລະດັບສູງ ຕະຫຼອດຮອດແຂກຖືກເຊີນເຂົ້າຮ່ວມ.
ໃນກອງປະຊຸມໄດ້ຮັບຟັງການສະເໜີບົດລາຍງານການເມືອງ ທັງ 2ພາກ, ໄດ້ຄົ້ນຄ້ວາແລະ ປະກອບຄຳເຫັນ ໃສ່ຮ່າງບົດລາຍງານການເມືອງ ພ້ອມທັງຮັບຮອງເອົາບົດສະຫຼຸບແລະ ແຜນວຽກຈຸດສຸມໃນ 5 ປີຕໍ່ໜ້າ 2024ຮອດປີ 2029; ໄດ້ຮັບຮອງເອົາບົດສຳຫຼວດນຳພາລວມ ຂອງຄະນະພັກຊຸດເກົ່າ ແລະ ໄດ້ຕີລາຄາດ້ານດີ, ດ້ານອ່ອນ, ຂໍ້ຄົງຄ້າງ, ສາເຫດ ແລະ ບົດຮຽນທີ່ຖອດຖອນໄດ້ໃນການນຳພາ-ຊີ້ນຳ ແລະ ການຈັດຕັ້ງປະຕິບັດມະຕິກອງປະຊຸມໃຫຍ່ໃນ 5 ປີຜ່ານມາ ເຮັດໃຫ້ໜ່ວຍພັກມີຄວາມເຂັ້ມແຂງຫຼາຍດ້ານ ຊຶ່ງສະແດງອອກໄລຍະ 5 ປີຜ່ານມາໜ່ວຍພັກກົມກິລາລະດັບສູງ ໄດ້ນາມມະຍົດໜ່ວຍພັກປອດໃສ, ເຂັ້ມແຂງ, ໜັກແໜ້ນຕິດຕໍ່ກັນ.
ພ້ອມກັນນັ້ນ, ໃນກອງປະຊຸມໄດ້ເລືອກຕັ້ງເອົາຄະນະໜ່ວຍພັກຊຸດໃໝ່ ບົນພື້ນຖານມາດຕະຖານ, ເງື່ອນໄຂທີ່ກໍານົດໄວ້ໃນກົດລະບຽບພັກ ຊຶ່ງມີຜູ້ອອກຮັບສະໝັກເລືອກຕັ້ງ 5 ສະຫາຍ, ຍິງ 1 ສະຫາຍ ແລະ ເລືອກໄດ້ 4 ສະຫາຍໂດຍຜົນກອງປະຊຸມຄັ້ງປະຖົມມະລຶກຂອງໜ່ວຍພັກຮາກຖານກົມກິລາລະດັບສູງ ເຫັນດີເລືອກໄດ້ສະຫາຍ ສີຈັນ ຈິດຕະປັນຍາ ເປັນເລຂາໜ່ວຍພັກ, ສະຫາຍ ປອ ຈັນທະວົງ ປັນຍາສິລິ ເປັນຮອງເລຂາໜ່ວຍພັກ, ສະຫາຍ ນາງ ພູຂົງ ນົນແກ້ວອິນທິຈັກ ເປັນຜູ້ກວດກາໜ່ວຍພັກ ແລະ ສະຫາຍ ບຸນມາ ທໍາມະວົງ ເປັນຮອງຜູ້ກວດກາໜ່ວຍພັກກົມກິລາລະດັບສູງ.
ໂອກາດນີ້, ສະຫາຍ ຮສ.ປອ ພຸດ ສິມມາລາວົງ ໄດ້ກ່າວສະແດງຄວາມຍ້ອງຍໍຊົມເຊີຍຊົມເຊີຍ ຕໍ່ການຊີ້ນຳ-ນຳພາຂອງຄະນະພັກຊຸດເກົ່າ ທີ່ໄດ້ຊີ້ນຳ-ນຳພາພະນັກງານ, ສະມາຊິກພັກ, ເຮັດໜ້າທີ່ການເມືອງຂອງຕົນ ແລະ ສາມາດຍາດໄດ້ຜົນສຳເລັດຫຼາຍດ້ານ, ພ້ອມທັງເນັ້ນໜັກໃຫ້ເພີ່ມທະວີຄວາມສາມັກຄີພາຍໃນພັກ, ເອົາໃຈໃສ່ສຶກສາອົບຮົມວຽກງານການເມືອງ-ແນວຄິດໃຫ້ແກ່ສະມາຊິກພັກ, ມິຄວາມເປັນເອກະພາບຕໍ່ການປ່ຽນແປງໃໝ່ ຕໍ່ຫຼັກການຂອງພັກ, ຕ້ານແນວຄິດຫຼາຍພັກຫຼາຍພວກ, ບໍ່ສ້າງຊ່ອງຫວ່າງໃຫ້ບຸກຄົນບໍ່ດີເຂົ້າມາ, ມີສະຕິໃນການຮັບຂ່າວສານຈາກສື່ຕ່າງໆ, ສືບຕໍ່ປັບປຸງກົງຈັກການຈັດຕັ້ງ ໃຫ້ເໝາະສົມກັບໜ້າທີ່ວິຊາສະເພາະ, ເອົາໃຈໃສ່ປັບປຸງກໍ່ສ້າງໜ່ວຍພັກໃຫ້ດີ, ສ້າງເງື່ອນໄຂໃຫ້ສະມາຊິກພັກ ໄດ້ມີໂອກາດໄປຍົກລະດັບທາງດ້ານທິດສະດີການເມືອງ ໄປຄຽງຄູ່ກັບດ້ານວຽກງານວິຊາສະເພາະ ແລະ ພາສາຕ່າງປະເທດ; ປັບປຸງແບບແຜນວິທີຊີ້ນຳ-ນຳພາ, ແບບແຜນວິທີເຮັດວຽກ, ເອົາໃຈໃສ່ຊີ້ນຳ-ນຳພາ ທາງດ້ານວຽກງານວິຊາສະເພາະ ກັບພາກສ່ວນທີ່ຂຶ້ນກັບການຊີ້ນຳທາງດ້ານວິຊາການ ສຶບຕໍ່ປັບປຸງບັນດານິຕິກຳ ທີ່ຮັບໃຊ້ວຽກງານກິລາ-ກາຍຍະກຳລະດັບສູງ ທີ່ເຫັນວ່າມີຄວາມຈໍາເປັນໃນການພັດທະນາວຽກງານກິລາ-ກາຍຍະກຳ ໃນຕໍ່ໜ້າ ໃຫ້ສຳເລັດ ແລະ ສາມາດນຳໄປຈັດຕັ້ງປະຕິບັດໄດ້. ພ້ອມທັງມີຄວາມເຊື່ອໝັ້ນຕໍ່ຄະນະໜ່ວຍພັກຊຸດໃໝ່ ທີ່ຈະສືບຕໍ່ຊີ້ນຳ-ນໍາພາ ຈັດຕັ້ງປະຕິບັດມະຕິກອງປະຊຸມໃຫຍ່ຂອງຕົນ ໃຫ້ຍາດໄດ້ຜົນງານ ແລະ ມີຜົນສຳເລັດຍິ່ງໃຫຍ່ກວ່າເກົ່າ
