ເມື່ອຕອນເຊົ້າວັນທີ 27 ເມສາ 2024 ທີ່ສະໂມສອນຊັ້ນ 2 ມະຫາວິທະຍາໄລແຫ່ງຊາດ ວິທະຍາເຂດດົງໂດກ ນະຄອນຫຼວງວຽງຈັນ ໄດ້ມີກອງປະຊຸມລາຍງານຄວາມຄືບໜ້າຂອງແຕ່ລະອານຸກຳມະການຈັດງານມະຫະກຳກິລາມະຫາວິທະຍາໄລລາວ ຄັ້ງທີ 2 ໂດຍໃຫ້ກຽດເປັນປະທານຂອງທ່ານ ຮສ.ປອ ອຸດົມ ພອນຄຳເພັງ ປະທານສະຫະພັນກິລາມະຫາວິທະຍາໄລລາວ ທັງເປັນປະທານຈັດງານມະຫະກຳກິລາມະຫາວິທະຍາໄລລາວ ຄັ້ງທີ 2, ມີຄະນະ ສກມລ, ຫົວໜ້າ-ຮອງຫົວໜ້າ ພ້ອມດ້ວຍຄະນະ ໃນແຕ່ລະອານຸກຳມະການເຂົ້າຮ່ວມ.
ໂອກາດນີ້, ທ່ານປະທານ ສກມລ ກ່າວວ່າ: ການຈັດງານມະຫະກຳກິລາມະຫາວິທະຍາໄລລາວ ຄັ້ງທີ 2 ແມ່ນມີຄວາມໝາຍຄວາມສຳຄັນ ເຊິ່ງຕິດພັນກັບ 3 ລັກສະນະ ແລະ 5 ຫຼັກມູນຂອງການສຶກສາ ພາຍຫຼັງສຳເລັດການຈັດງານມະຫະກຳກິລາມະຫາວິທະຍາໄລລາວ ຄັ້ງ 1 ໃນປີ 2016 ທີ່ມະຫາວິທະຍາໄລແຫ່ງຊາດ ເປັນເຈົ້າພາບ ໄດ້ຮັບຜົນສຳເລັດຢ່າງໜ້າເພິ່ງພໍໃຈ ແລະ ໄດ້ມອບຕໍ່ໃຫ້ມະຫາວິທະຍາໄລຈຳປາສັກ ຫ້າງຫາກະກຽມເປັນເຈົ້າພາບໃນຄັ້ງຕໍ່ໄປ ແຕ່ອີງໃສ່ຄວາມພ້ອມດ້ານຕ່າງໆເຫັນວ່າ ຍັງບໍ່ມີສັກກາຍະພາບພຽງພໍເທື່ຶອ ໂດຍສະເພາະພື້ນຖານໂຄງລ່າງ ສະນັ້ນ ຈຶ່ງເລືອກເອົາມະຫາວິທະຍາໄລແຫ່ງຊາດ ເປັນເຈົ້າພາບອີກຄັ້ງໜຶ່ງ ເຊິ່ງການແຂ່ງຂັນຄັ້ງນີ້ ຈະແຕກຕ່າງຈາກຄັ້ງຜ່ານມາ ນອກຈາກຈະມີນັກກິລານັກຮຽນຈາກມະຫາວິທະຍາໄລພາກລັດແລ້ວ ຍັງຈະມີວິທະຍາຄານ ປກສ, ປກຊ ແລະ ສະຖາບັນການສຶກສາພາກເອກະຊົນເຂົ້າຮ່ວມ ເຊິ່ງເປັນນິມິດໝາຍທີ່ດີ ດ້ານໜຶ່ງກໍເພື່ອເປັນການເຂັ້ນຫານັກກິລາ ເພື່ອເປັນຕົວແທນມະຫາວິທະຍາໄລລາວ ເຂົ້າຮ່ວມການແຂ່ງຂັນກິລາມະຫາວິທະຍາໄລອາຊຽນ ຄັ້ງທີ 21 ທີ່ຈະຈັດຂຶ້ນຢູ່ປະເທດອິນໂດເນເຊຍ ໃນເດືອນມິຖາ 2024 ນີ້ ສະນັ້ນ ຈຶ່ງຮຽກຮ້ອງໃຫ້ແຕອະນຸກຳມະການ ທີ່ຖືກແຕ່ງຕັ້ງ ເຮັດວຽກຢ່າງຈິງຈັງ, ອົດທົນ ແລະ ໃຫ້ໄດ້ຮັບຜົນສຳເລັດຕາມລະດັບຄາດໝາຍທີ່ວາງໄວ້ ເຖິງແມ່ນວ່າ ເວລາກະກຽມຈະສັ້ນ, ງົບປະມານຈະມີຈຳກັດ ແຕ່ໃຫ້ທຸກຝ່າຍເຮັດວຽກດ້ວຍຄວາມຜິດຊອບສູງ ແລະ ເຮັດສຸດຄວາມສາມາດ ໝູນໃຊ້ຊັບພະຍາກອນທີ່ມີຢູ່ໃຫ້ເກີດຜົນປະໂຫຍດສູງສຸດ.
ຫຼັງຈາກນັ້ນ, ຕາງໜ້າແຕ່ລະອະນຸກຳມະການກໍໄດ້ຜັດປ່ຽນຂຶ້ນລາຍງານຄວາມຄືບໜ້າ ແຜນວຽກຂອງຕົນທີ່ຖືກມອບໝາຍ ເຫັນວ່າ ແຕ່ລະອະນຸກຳມະການ ແມ່ນເກືອບວ່າສຳເລັດແລ້ວ 100 % ເປັນຕົ້ນແມ່ນ ອະນຸກຳມະການເນື້ອໃນ ແມ່ນໄດ້ສຳເລັດການກະກຽມຄຳຂວັນ ງານມະຫະກຳກິລາມະຫາວິທະຍາໄລລາວ ຄັ້ງທີ 2, ສຳເລັດການກະກຽມເນື້ອໃນຖະແຫຼງການ ແລະ ບົດລາຍງານພິທີເປີດ. ສ່ວນອະນຸກຳມະການພິທີການ, ຕ້ອນຮັບແຂກ ແລະ ອາສາສະໝັກ ແມ່ນສຳເລັດການອອກແບບສະຖານພິທີເປີດການແຂ່ງຂັນ, ຕິດຕັ້ງຈໍ LED ແລະ ຄັດເລືອກອາສາສະໝັກ ທີ່ເປັນນັກສຶກສາ; ຂະນະທີ່ ອະນຸກຳມະການບໍລິຫານ-ບໍລິການ ແມ່ນສຳເລັດການກຳນົດກົດລະບຽບງົບປະມານຈັດຊື້-ຈັດຈ້າງຕ່າງໆ, ອອກແບບສັດນຳໂຊກ, ຜະລິດຫຼຽນລາງວັນ ລວມທັງຈັດແຈງຫ້ອງເຮັດວຽກໃຫ້ແຕ່ລະອະນຸກຳມະການ ເຊິ່ງໄດ້ເອົາສະໂມສອນໃຫຍ່ ມຊ ເປັນສູນບໍລິການຂອງແຕ່ລະອະນຸກຳມະການຝ່າຍໆຕ່າງໆ ສ່ວນອະນຸກຳມະການພິທີເປີດ-ປິດ ແມ່ນໄດ້ສຳເລັດການກຳນົດລາຍການສະແດງຕ່າງໆ, ກຳນົດວາລະໃນມື້ເປີດ, ໂດຍຈະເລີ່ມເຕົ້າໂຮມແຂກ ແລະ ນັກກິລາແຕ່ເວລາ 14:00 ໂມງ ເປັນຕົ້ນໄປ ໂດຍກຳນົດເອົາສະໂມສອນໃຫຍ່ ມຊ ເປັນສະຖານທີ່ ພິທີເປີດ-ປິດ ໂດຍອີງໃສ່ງົບປະມານ ແລະ ບົດຮຽນຈາກສາກົນ ຂະນະທີ່ ອະນຸກຳມການ ຂ່າວສານ ແລະ ຍ້ອງຍໍ ກໍມີຄວາມພ້ອມແລ້ວເຊັ່ນກັນ ໂດຍສະເພາະໜ່ວຍງານຂ່າວສານ ໄດ້ມີການເປີດສູນຂ່າວ ເພື່ອອຳນວຍຄວາມສະດວກໃຫ້ບັນສື່ມວນຊົນທີ່ຈະມາເຄື່ອນໄຫວເຮັດວຽກຮ່ວມກັນໃນໄລຍະການແຂ່ງຂັນດັ່ງກ່າວ.
ສຳລັບງານມະຫະກຳກິລາມະຫາວິທະຍາໄລລາວ ຄັ້ງທີ 2 ແມ່ນຈະຈັດຂຶ້ນຢ່າງເປັນທາງການ ລະຫວ່າງວັນທີ 5-15 ພຶດສະພາ 2024 ນີ້ ມີການຊີງໄຊຫຼຽນທັງໝົດ 109 ຫຼຽນຄຳ ໃນຈຳນວນ 11 ປະເພດກິລາ ປະກອບມີ: ບານເຕະຊາຍ-ຍິງ, ບານສົ່ງຮົ່ມ ແລະ ຫາດຊາຍ, ບານບ້ວງ 3×3, ເປຕັງ, ຢູໂດ, ເທຄວັນໂດ, ປັນຈັກສີລັດ, ດອກປີກໄກ່, ກະຕໍ້ ແລະ ອີ-ສະປອດ ຊຶ່ງ 10 ປະເພດ ແມ່ນຈະຈັດຢູ່ ມຊ ວິທະຍາເຂດດົງໂດກ ຍົກເວັ້ນ ກິລາ ຢູໂດ ຈະຈັດຢູ່ສູນບູໂດເຊັນເຕີ ເຈົ້າອານຸວົງ.
#ພາບ: ຕຸ່ນຄຳ, ຂ່າວ: ຄຳຫຼ້າ ສາຍນ້ຳພຽງ
