ສະຖາບັນກິລາ-ກາຍຍະກຳ ຫຼື ສບກ ໄດ້ຈັດພິທີປະກາດຮອງຜູ້ອຳນວຍການ ສບກ ເຂົ້າຮັບອຸດໜູນບຳນານ ແລະ ປະກາດແຕ່ງຕັ້ງຮອງຜູ້ອຳນວຍການ ສບກ ຜູ້ໃໝ່

ເມື່ອຕອນບ່າຍວັນທີ 01 ມີນາ 2024 ສະຖາບັນກິລາ-ກາຍຍະກຳ ຫຼື ສບກ ໄດ້ຈັດພິທີປະກາດຮອງຜູ້ອຳນວຍການ ສບກ ເຂົ້າຮັບອຸດໜູນບຳນານ ແລະ ປະກາດແຕ່ງຕັ້ງຮອງຜູ້ອຳນວຍການ ສບກ ຜູ້ໃໝ່ ຂຶ້ນທີ່ຫ້ອງປະຊຸມ ສະຖາບັນກິລາ-ກາຍຍະກຳ, ພາຍໃຕ້ການເປັນປະທານຂອງ ປອ. ສຳລານ ພັນທະວົງ ຄະນະປະຈຳພັກກະຊວງ, ປະທານກວດກາພັກກະຊວງ, ຫົວໜ້າກົມປະກັນຄຸນະພາບການສຶກສາ, ທ່ານ ນາງ ວຽງແກ້ວ ພົມມະວົງ ຄະນະພັກກະຊວງ, ຫົວໜ້າກົມຈັດຕັ້ງ ແລະ ພະນັກງານ ກະຊວງສຶກສາທິການ ແລະ ກິລາ, ທ່ານ ສຸລິວັນ ເຊີນວິໄລ ເລຂາໜ່ວຍພັກຮາກຖານ ສບກ, ຜູ້ອຳນວຍການ ສບກ, ພ້ອມດ້ວຍຄະນະອຳນວຍການ ແລະ ພະນັກງານ, ຄູ-ອາຈານ ພາຍໃນສະຖາບັນ ເຂົ້າຮ່ວມຢ່າງພ້ອມພຽງ; 

ໂອກາດນີ້ ທ່ານ ນາງ ວຽງແກ້ວ ພົມມະວົງ ຫົວໜ້າກົມຈັດຕັ້ງ ແລະ ພະນັກງານ ກະຊວງສຶກສາທິການ ແລະ ກິລາ ໄດ້ ຜ່ານຂໍ້ຕົກລົງວ່າດ້ວຍການອະນຸມັດໃຫ້ ທ່ານ ສົມພອນ ມະນີຄຳ ຮອງຜູ້ອຳນວຍການສະຖາບັນກິລາ-ກາຍຍະກຳ, ຜູ້ອຳນວຍການສູນວິທະຍາສາດການກິລາ ເຂົ້າອຸດໜູນບຳນານ ແລະ ຜ່ານຂໍ້ຕົກລົງວ່າດ້ວຍການແຕ່ງຕັ້ງພະນັກງານດຳລົງຕຳແໜ່ງບໍລິຫານ (ປະເພດ 3) ໂດຍແຕ່ງຕັ້ງ ປອ. ສອນເພັດ ຈັນດານຸວົງ ຫົວໜ້າພາກວິຊາກິລາ-ກາຍຍະກຳ ຂຶ້ນເປັນຮອງຜູ້ອຳນວຍສະຖາບັນກິລາ-ກາຍຍະກຳ ຄົນໃໝ່
ພ້ອມກັນນີ້ ປອ. ສຳລານ ພັນທະວົງ ຫົວໜ້າກົມປະກັນຄຸນະພາບການສຶກສາ ໄດ້ໃຫ້ຄຳໂອວາດ ໃຫ້ແກ່ພະນັກງານທີ່ຮັບອຸດໜູນບຳນານ ແລະ ພະນັກງານທີ່ຮັບຕຳແໜ່ງໃໝ່ໃນການຈັດຕັ້ງປະຕິບັດວຽກງານຕໍ່ໄປ

ວາລະສຸດທ້າຍ ປອ. ສອນເພັດ ຈັນດານຸວົງ ຮອງຜູ້ອຳນວຍການສະຖາບັນກິລາ-ກາຍຍະກຳ ຄົນໃໝ່ ກໍໄດ້ຂຶ້ນຮັບຄຳໂອວາດ, ຊີ້ນຳ ແລະ ກ່າວປະຕິຍານຕົນໃນໂອກາດຮັບຕຳແໜ່ງໃໝ່ຄັ້ງນີ້.

ຂ່າວໂດຍ: ກັນຍາເພັດ ພັນດານຸວົງ
ຮູບພາບໂດຍ: ກັນຍາເພັດ ພັນດານຸວົງ ແລະ ອຳຄາ ວົງພະຈັນ