ພິທີເປີດການແຂ່ງຂັນກິລາ ຕີຄີສາກົນ ລະດັບມັດທະຍົມລາວ ຈັດຂຶ້ນ ວັນທີ 19 ເມສາ 2024 ທີ່ສູນການຄ້າ ວຽງຈັນເຊັນເຕີ ເມືອງສີສັດຕະນາກ ນະຄອນຫຼວງວຽງຈັນ ໂດຍໃຫ້ກຽດເຂົ້າຮ່ວມມີທ່ານ ແສງພອນ ພົນອາມາດ ຫົວໜ້າກົມກິລາລະດັບສູງ ທັງເປັນຮອງປະທານ-ເລຂາທິການ ຄະນະກຳມະການໂອແລມປິກແຫ່ງຊາດລາວ, ທ່ານ ຈັນທະວົງ ປັນຍາສີຣິ ຮອງຫົວໜ້າກົມກິລາລະດັບສູງ ແລະ ທ່ານ ບຸນທະໜອມ ສີຫາລາດ ປະທານສະໂມສອນ ມາສເຕີ ຟລໍບໍ ມີບັນດາຄະນະອຳນວຍການ, ຄະນະນຳສະໂມສອນ, ບັນດາຜູ້ໃຫ້ການສະໜັບສະໜູນ, ຄູຝຶກ-ນັກກິລາ ແລະ ສື່ມວນຊົນ ຕະຫຼອດຮອດກອງເຊຍເຂົ້າຮ່ວມຢ່າງຫຼວງຫຼາຍ.
ໂອກາດນີ້, ທ່ານ ບຸນທະໜອມ ສີຫາລາດ ກ່າວວ່າ: ກິລາຟລໍບໍ ມີຕົ້ນກຳເນີດມາຈາກປະເທດ ສະວີເດັນ ເມື່ອປີ 1979 ແລະ ໄດ້ເຕີບໃຫຍ່ຂະຫຍາຍຕົວຈາກປະເທດດັ່ງກ່າວ ເປັນທີ່ນິຍົມຊົມຊອບຫຼາຍໆຊາດ ໄດ້ນຳໄປຫຼິ້ນ ແລະ ກໍມີການສ້າງຕັ້ງ ສະຫະພັນກິລາຟລໍບໍ ສາກົນ ຫຼື ທີ່ເອີ້ນກັນວ່າ IMS ຊຶ່ງມີຕົວແທນຈາກ IMS ແມ່ນໂຊນອາຊີ ຫຼື AOMC ຊຶ່ງມີການສ້າງຕັ້ງສູນກິລານີ້ ທີ່ນະຄອນຫຼວງ ບາງກອກ ປະເທດໄທ ແລະ ໄດ້ມີການເສີມຂະຫຍາຍໄປເຖິງ 26 ປະເທດໃນປັດຈຸບັນ, ໃນນັ້ນ ກໍໄດ້ມີການແຂ່ງຂັນລະດັບພາກພື້ນ ມີ 6 ຊາດ ເຂົ້າຮ່ວມ ກໍຄື ໄທ, ສິງກະໂປ, ຟິລິບປິນ, ກຳປູເຈຍ, ມາເລເຊຍ, ອິນໂດເນເຊຍ ພິເສດ ໃນງານກິລາຊີເກມ ຄັ້ງທີ 32 ທີ່ປະເທດກຳປູເຈຍ ກິລາດັ່ງກ່າວ ກໍໄດ້ມີການສາທິດ ເປັນທາງການ ແລະ ແນ່ນອນວ່າ ງານກິລາ ຊີເກມ ຄັ້ງທີ 33 ທີ່ປະເທດໄທ ຈະຖືກບັນຈຸຊີງໄຊ ແລະ ສປປ ລາວ ກໍຈະສົ່ງນັກກິລາເຂົ້າຮ່ວມແຂ່ງຂັນ ໂດຍອີງໃສ່ໂຄງການຊ້າງເຜືອກ ທີ່ພວກເຮົາຈັດແຂ່ງຂັນປັດຈຸບັນ ເພື່ອເຮັດໃຫ້ກິລາດັ່ງກ່າວ ມີການເຕີບໃຫຍ່ຂະຫຍາຍຕົວຂຶ້ນເລື້ອຍໆ.
ພ້ອມກັນນັ້ນ, ທ່ານ ແສງພອນ ພົນອາມາດ ຫົວໜ້າກົມກິລາລະດັບສູງ ທັງເປັນຮອງປະທານ-ເລຂາທິການ ຄະນະກຳມະການໂອແລມປິກແຫ່ງຊາດລາວ ກໍ່ໄດ້ກ່າວເປີດພິທີ ແລະ ກ່າວຊົມເຊີຍຄະນະຈັດການແຂ່ງຂັນ ທີ່ມີຄວາມຕັ້ງໃຈຢາກກໍ່ສ້າງກິລາຟລໍບໍນີ້ຂື້ນມາ ເພືອ່ພັດທະນາແລະສົ່ງເສີມນັກກິລາລາວ ແລະ ມີເປົ້າຫມາຍຢາກສ້າງສື່ສຽງໃຫ້ກັບປະເທດລາວເຮົາ. ສຳລັບ ທາງກົມກິລາລະດັບສູງ ແມ່ນພ້ອມໃຫ້ການສະຫນັບສະຫນູນກິລາຟລໍບໍ ໃນທຸກເວທີ ແລະ ຂໍໃຫ້ທຸກທ່ານຈົນສືບຕໍ່ ແລະ ທຸ້ມເທ ພັດທະນາກິລາຟລໍບໍ.
