
ຄະນະນັກສຳມະນາກອນຈາກ ສປປ ລາວ ຈຳນວນ 15 ທ່ານ ໄດ້ເຂົ້າຮ່ວມ ຊຸດຝຶກອົບຮົມການແລກປ່ຽນເຕັກນິກການກິລາຊາວໜຸ່ມ ປະເທດອາຊຽນ, ເຊິ່ງຈັດຂຶ້ນໃນລະຫວ່າງວັນທີ 20-29 ຕຸລາ 2026 ຢູ່ທີ່ ເມືອງໜານໜິງ, ນະຄອນກວາງຊີ, ສປ ຈີນ. ເພື່ອເສີມສ້າງຄວາມເຂັ້ມແຂງ ແລະ ແລກປ່ຽນບົດຮຽນດ້ານການກິລາ,
ຊຸດຝຶກອົບຮົມຄັ້ງນີ້ ໄດ້ຮັບການສະໜັບສະໜູນຈາກ ກະຊວງການຄ້າ ສປ ຈີນ ແລະ ຈັດໂດຍ ວິທະຍາໄລອາຊີວະບໍລິຫານທຸລະກິດສາກົນກວາງຊີ. ພິທີເປີດຢ່າງເປັນທາງການ ໄດ້ຈັດຂຶ້ນໃນວັນທີ 20 ຕຸລາ 2026 ເວລາ 10:30 ໂມງ ໂດຍໃຫ້ກຽດຕ້ອນຮັບ ແລະ ກ່າວເປີດໂດຍ ທ່ານ Diqiong Zhao, ຮອງຜູ້ອຳນວຍການວິທະຍາໄລອາຊີວະບໍລິຫານທຸລະກິດສາກົນກວາງຊີ.
ການຝຶກອົບຮົມໃນຄັ້ງນີ້ ມີຜູ້ເຂົ້າຮ່ວມທັງໝົດ 29 ທ່ານ ຈາກ 3 ປະເທດອາຊຽນ ຄື: ສປປ ລາວ, ກຳປູເຈຍ ແລະ ອິນໂດເນເຊຍ. ສຳລັບນັກສຳມະນາກອນ ສປປ ລາວ 15 ທ່ານ ທີ່ເຂົ້າຮ່ວມ ແມ່ນຕາງໜ້າຈາກ 2 ພາກສ່ວນຫຼັກ ຄື:
- ກະຊວງສຶກສາທິການ ແລະ ກິລາ: ກົມກິລາລະດັບສູງ, ກົມກິລາມວນຊົນ, ພະລະ ແລະ ສິລະປະສຶກສາ, ສະຖາບັນກິລາ-ກາຍຍະກຳ ແລະ ວິທະຍາໄລພະລະສຶກສາ
- ສູນກາງຊາວໜຸ່ມ ປະຊາຊົນ ປະຕິວັດລາວ (ຄຊປປລ)
ຕະຫຼອດໄລຍະການຝຶກອົບຮົມ, ຜູ້ເຂົ້າຮ່ວມໄດ້ຮຽນຮູ້ ແລະ ແລກປ່ຽນໃນຫຼາຍກິດຈະກຳສຳຄັນ ດັ່ງນີ້:
- ການແລກປ່ຽນເຕັກນິກການກິລາເຍົາວະຊົນ-ຊາວໜຸ່ມ: ສຸມໃສ່ການພັດທະນາ ແລະ ຍົກລະດັບການຝຶກຊ້ອມຢ່າງມີວິທະຍາສາດ, ການຟື້ນຟູສະມັດຕະພາບທາງດ້ານກາຍະພາບຂອງນັກກິລາ, ລວມທັງການສົ່ງເສີມການເຊື່ອມໂຍງລະຫວ່າງ ການກິລາ, ການທ່ອງທ່ຽວ ແລະ ວັດທະນະທຳ.
- ການທັດສະນະສຶກສາສູນກິດຈະກຳເຍົາວະຊົນ ແລະ ເດັກ ເມືອງໜານໜິງ: ໄດ້ເຂົ້າຢ້ຽມຊົມສູນກິດຈະກຳທີ່ທັນສະໄໝ ເຊິ່ງເປັນບ່ອນຈັດກິດຈະກຳ, ຝຶກອົບຮົມ, ແລະ ເພີ່ມພູນທັກສະດ້ານການກິລາ, ສິລະປະ, ວັດທະນະທຳ ແລະ ເທັກໂນໂລຢີ ເພື່ອສົ່ງເສີມການຮຽນຮູ້ນອກໂຮງຮຽນ ແລະ ພັດທະນາສັກກະຍາພາບຂອງເດັກ-ເຍົາວະຊົນ. ພ້ອມນີ້, ຍັງໄດ້ມີການຈັດກິດຈະກຳແຂ່ງຂັນກິລາຕີດອກປີກໄກ່ ແລະ ປິ່ງປ່ອງ ຮ່ວມກັບບັນດາປະເທດເຂົ້າຮ່ວມຢ່າງອົບອຸ່ນ.
- ການທັດສະນະສຶກສາ ແລະ ແລກປ່ຽນກິລາມວນຊົນ: ເຂົ້າຢ້ຽມຊົມໂຄງການໄປ໋ຊາຣີສອດນານາຊາດດ້ານສຸຂະພາບ ແລະ ການພັກຜ່ອນ ຢູ່ທີ່ ເມືອງຟາງເຊິງກັງ ພ້ອມທັງໄດ້ຮ່ວມກິດຈະກຳກິລາມວນຊົນຢ່າງມ່ວນຊື່ນ ເປັນຕົ້ນແມ່ນ ການແຂ່ງຂັນດຶງເຊືອກ, ແຂ່ງເຮືອບົກ ແລະ ບານສົ່ງຫາດຊາຍ.
- ການແລກປ່ຽນວັດທະນະທຳ: ຮ່ວມຝຶກແອບ ແລະ ເຮັດກິດຈະກຳລຳມວຍຈີນ ເພື່ອຮຽນຮູ້ວັດທະນະທຳ ແລະ ການສົ່ງເສີມສຸຂະພາບ.
ຊຸດຝຶກອົບຮົມຄັ້ງນີ້ ນອກຈາກຈະເປັນການຍົກລະດັບຄວາມຮູ້-ຄວາມສາມາດດ້ານເຕັກນິກການກິລາເຍົາວະຊົນໃຫ້ກັບບຸກຄະລາກອນຂອງ ສປປ ລາວ ແລ້ວ, ຍັງເປັນການເສີມສ້າງສາຍພົວພັນມິດຕະພາບ, ຄວາມຮ່ວມມື ແລະ ການແລກປ່ຽນວັດທະນະທຳອັນດີງາມ ລະຫວ່າງ ສປ ຈີນ ແລະ ບັນດາປະເທດອາຊຽນໃຫ້ແໜ້ນແຟ້ນຍິ່ງໆຂຶ້ນ.



