ເມື່ອວັນທີ 29 ເມສາ ຜ່ານມາ ທີ່ຫ້ອງປະຊຸມຄະນະກຳມະການໂອແລມປິກແກຫ່ງຊາດລາວ ຄະນະບໍລິຫານງານຊາວໜຸ່ມ ປະຊາຊົນ ປະຕິບັດລາວ (ຄຊປປລ) ໜ່ວຍຊາວຫນຸ່ມຮາກຖານກົມກິລາລະດັບສູງ (ກສ) ໄດ້ເປີດກອງປະຊຸມໃຫຍ່ ຄັ້ງທີ I ພ້ອມປ່ອນບັດຄັດເລືອກເອົາຄະນະບໍລິຫານງານຊຸດໃໝ່ ຂື້ນ. ພາຍໃຕ້ການເປັນປະທານຂອງສະຫາຍ ບຸນຂົງ ຈັກວົງສາ ເລຂາຄະນະບໍລິຫານງານຊາວຫນຸ່ມສຳນັກກະຊວງສຶກສາທິການ ແລະ ກິລາ, ສະຫາຍ ສີຈັນ ຈິດຕະປັນຍາ ຮອງເລຂາຫນ່ວຍພັກກົມກິລາລະດັບສູງ ກະຊວງສຶກສາທິການ ແລະ ກິລາ ມີບັນດາສະຫາຍຊາວຫນຸ່ມຈາກກົມທີ່ໃກ້ຄຽງ, ທ່ານປະທານ 3 ອົງການຈັດຕັ້ງມະຫາຊົນຂອງກົມກິລາລະດັບສູງ ແລະ ສຳມະຊິກຫນ່ວຍຊາວຫນຸ່ມກົມກິລາລະດັບສູງ ເຂົ້າຮ່ວມຢ່າງພ້ອມພຽງ.
ໂອກາດນີ້, ສະຫາຍ ບຸນມາ ທຳມະວົງ ເລຂາຫນ່ວຍຊາວຫນຸ່ມຮາກຖານກົມກິລາລະດັບສູງ ໄດ້ຂື້ນກ່າວເປີດກອງປະຊຸມໃຫຍ່ ແລະ ຜ່ານຂໍ້ຕົກລົງວ່າດ້ວຍການອານຸມັດເປີດກອງປະຊຸມໃຫຍ່ ຄັ້ງທີ I.
ຂະນະທີ່, ສະຫາຍ ບຸນຍະແສງ ນະຊຽງຄຳ ຮອງເລຂາຫນ່ວຍຊາວຫນຸ່ມຮາກຖານກົມກິລາລະດັບສູງ ໄດ້ຜ່ານບົດລາຍງານການເມືອງ ແລະ ບົດສຳຫລວດການນຳພາລວມຂອງ ຄຊປປລ ຫນ່ວຍຊາວຫນຸ່ມຮາກຖານກົມກິລາລະດັບສູງ.
ພ້ອມກັນນັ້ນ, ໃນກອງປະຊຸມໃຫຍ່ຄັ້ງນີ້ ຍັງໄດ້ມີການສະຫລຸບຜົນງານຂອງຄະນະບໍລິຫານງານຫນ່ວຍຊາວຫນຸ່ມຮາກຖານກົມຊຸດເກົ່າ ແລະ ຍັງໄດ້ມີການ ຜ່ານຂໍ້ຕົກລົງແຕ່ງຕັ້ງຄະນະຮັບຜິດຊອບກອງປະຊຸມໃຫຍ່ຄັ້ງນີ້, ຜ່ານເງື່ອນໄຂມາດຖານ ແລະ ປະກາດລາຍຊື່ຜູ້ສະໝັກ, ຜ່ານລະບຽບການປ່ອນບັດເລືອກຕັ້ງຄະນະຊາວຫນຸ່ມຮາກຖານກົມຊຸດໃຫມ່ ນຳອີກ.
ຜ່ານການປ່ອນບັດເລືອກຕັ້ງຄະນະບໍລິຫານງານຫນ່ວຍຊາວຫນຸ່ມຮາກຖານກົມກິລາລະດັບສູງ ຊຸດໃຫມ່ ແມ່ນເລືອກໄດ້ 3 ສະຫາຍ ປະກອບມີ ສະຫາຍ ບຸນຍະແສງ ນະຊຽງຄຳ ເປັນເລຂາຫນ່ວຍຊາວຫນຸ່ມຮາກຖານກົມ, ສະຫາຍ ນາງ ຄຳບາງ ສົມພັນທອງ ເປັນຮອງເລຂາຫນ່ວຍຊາວຫນຸ່ມຮາກຖານກົມ ແລະ ສະຫາຍ ອຳໄພວັນ ຈັນທະລາວົງ ເປັນຄະນະ ແລະ ທັງເປັນຜູ້ກວດກາຫນ່ວຍຊາວຫນຸ່ມຮາກຖານກົມ.
