ໃນລະຫວ່າງວັນທີ 19-22 ສິງຫາ ຜ່ານມາ, ຕົວແທນຈາກ ສປປ ລາວ ຈຳນວນ 5 ທ່ານ ປະກອບມີ: ທ່ານນາງ ແສງພະຈັນ ພະຈັນ ພະນັກງານວິຊາການ ຈາກກົມກິລາລະດັບສູງ ພ້ອມດ້ວຍຕົວແທນນັກກິລາ 4 ທ່ານ (ຈາກປະເພດກິລາ ປິງປ່ອງ, ແລ່ນ-ລານ, ຢູໂດ ແລະ ເບສບອນ ປະເພດລະ 1 ທ່ານ) ໄດ້ເຂົ້າຮ່ວມໂຄງການຄ້າຍເຍົາວະຊົນທີ່ປອດໃສ ປະຈຳປີ 2026 (2026 Clean Sport Youth Camp) ທີ່ມະຫາວິທະຍາໄລ Pukyong National University, ເມືອງປູຊານ, ສ.ເກົາຫຼີ.
ໂຄງການດັ່ງກ່າວ ຈັດຂຶ້ນໂດຍໄດ້ຮັບການສະໜັບສະໜູນຈາກ ອົງການຕ້ານການໃຊ້ສານຕ້ອງຫ້າມ ສ.ເກົາຫຼີ (Korea Anti-Doping Agency: KADA), ອົງການຕ້ານການໃຊ້ສານຕ້ອງຫ້າມໂລກ (World Anti-Doping Agency: WADA) ແລະ ມະຫານະຄອນປູຊານ (Busan Metropolitan City). ໂດຍມີຜູ້ເຂົ້າຮ່ວມທັງໝົດ 58 ທ່ານ ຈາກ 7 ປະເທດ ຄື: ສປປ ລາວ, ກຳປູເຈຍ, ສ.ເກົາຫຼີ, ຊີລັງກາ, ມັລດີບ, ບູຕານ ແລະ ກູເວດ. ກິດຈະກຳຕະຫຼອດ 4 ວັນຂອງການເຂົ້າຄ້າຍ ໄດ້ດຳເນີນໄປຢ່າງຟົດຟື້ນ ແລະ ມີເນື້ອໃນອຸດົມສົມບູນ ໂດຍແບ່ງອອກເປັນ 2 ພາກຄື: ພາກທິດສະດີ: ໄດ້ຮັບຟັງການບັນຍາຍຈາກຜູ້ຊ່ຽວຊານຂອງອົງການຕ້ານການໃຊ້ສານຕ້ອງຫ້າມ ສ.ເກົາຫຼີ ເຊິ່ງໄດ້ໃຫ້ຄວາມຮູ້ພື້ນຖານກ່ຽວກັບສານຕ້ອງຫ້າມ, ແນວທາງການປ້ອງກັນ, ຕະຫຼອດຮອດຂັ້ນຕອນ ແລະ ກົນໄກຂອງການກວດສອບສານຕ້ອງຫ້າມໃນນັກກິລາ, ແລະ ພາກກິດຈະກຳ: ເປັນການເຮັດວຽກຮ່ວມກັນໃນຮູບແບບແບ່ງກຸ່ມຈາກຜູ້ເຂົ້າຮ່ວມທຸກປະເທດ.
ຈຸດປະສົງຫຼັກຂອງໂຄງການ “2026 Clean Sport Youth Camp” ແມ່ນເພື່ອເສີມສ້າງຄວາມຮູ້ພື້ນຖານກ່ຽວກັບສານຕ້ອງຫ້າມໃຫ້ແກ່ເຍົາວະຊົນ ແລະ ຊາວໜຸ່ມ ໂດຍສະເພາະຊາວໜຸ່ມທີ່ເປັນນັກກິລາ ພ້ອມທັງມີການການແລກປ່ຽນຄວາມຮູ້, ແລກປ່ຽນວັດທະນຳທຳກັບບັນດາຜູ້ເຂົ້າຮ່ວມຈາກຫຼາຍປະເທດ ຜ່ານກິດຈະກຳຕ່າງໆໃນລະຫວ່າງການເຂົ້າຄ້າຍ. ພ້ອມທັງເປັນເວທີໃນການແລກປ່ຽນຄວາມຮູ້ ແລະ ວັດທະນະທຳອັນດີງາມ ລະຫວ່າງ ເຍົາວະຊົນ ຂອງບັນດາປະເທດທີ່ເຂົ້າຮ່ວມຢ່າງອົບອຸ່ນ.
