ສະໂມສອນ ເບ ສະຫວັນ ເອັຟຊີ ແຊ໋ມເກົ່າ ສາມາດປ້ອງກັນແຊ໋ມໄດ້ສຳເລັດ ໃນການແຂ່ງຂັນບານເຕະ ລາວ ຟຸດຊໍ ລີກ 2024 LAO FUTSAL LEAGUE 2024 ພາຍຫລັງຖະຫລົ່ມ ສະໂມສອນ ເອັສທີທີ ເອັຟຊີ ໄປແບບຂາດຮອຍ 10-3 ປະຕູ ພ້ອມກັບຄວ້າ 3 ລາງວັນ ໄປຄອງ.
ເມື່ອວັນທີ 2 ມິຖຸນາ ຜ່ານມາ ທີ່ສະຫນາມຟຸດຊໍ ສະຫະພັນບານເຕະແຫ່ງຊາດລາວ ໄດ້ມີການແຂ່ງຂັນບານເຕະ ລາວຟຸດຊໍລີກ 2024 ລະຫວ່າງສະໂມສອນ ເບ ສະຫວັນ ເອັຟຊີ ແຊ໋ມເກົ່າ ພົບກັບ ສະໂມສອນ ເອັສທີທີ ເອັຟຊີ, ຜ່ານການແຂ່ງຂັນຜົນປະກົດວ່າ ເບສະຫວັນ ເອົາຊະນະ ເອັສທີທີໄປຢ່າງຂາດລອຍ 10-3, ເບສະຫວັນ ໄດ້ປະຕູຈາກ: ເບີ 18 ວົງພະຈັນ ພຸດທະວົງ ນາທີ 8, 38 ( OG ), ເບີ 7 ຄຳຜາ ພິພັກຂະວົງ ນາທີ 11, 20, 34, 35, ເບີ 27 ຂຸນວັງ ສູນດາລາ ນາທີ 19, ເບີ 9 ສຸລິຈັນ ພະສະແຫວງ ນາທີ 30, ເບີ 8 ນິດນີລັນ ຈັນຈະເລີນ ນາທີ 39, ເບີ 32 ວັນນາ ບຸນຫລໍ່ວົງສາ ນາທີ 37 ສ່ວນ ເອັສທີທີ ໄດ້ປະຕູຈາກ: ເບີ 1 ແບ້ງ ຊະນະສິດ ( OG ), ເບີ 88 ມະໂນລົມ ເພັດພັກດີ ນາທີ 26, ເບີ 44 ນະລິນ ຫຼວງສີສົມບັດ ນາທີ 29, ຈາກໄຊຊະນະດັ່ງກ່າວເຮັດໃຫ້ ເບສະຫວັນ ຄວ້າແຊ້ມລາຍການດັ່ງກ່າວເປັນສະໄໝທີ່2ຕິດຕໍ່ກັນ,ເຊິ່ງກ່ອນຫນ້ານັ້ນແມ່ນໄດ້ແຊ້ມໃນປີ 2023.
ສຳລັບ ຜົນສະຫລຸບອັນດັບ ປະກອບມີດັ່ງລຸ່ມນີ້ :
ອັນດັບ 1 ຊະນະເລີດ ເບສະຫວັນ ໄດ້ຮັບຂັນແຊັມ 1 ໜ່ວຍ ພ້ອມຫຼຽນຊະນະເລີດ ເເລະ ເງິນລາງວັນ ຈຳນວນ 50.000.000ກີບ
ອັນດັບ 2 ຮອງຊະນະເລີດ ເອັສທີທີ ໄດ້ຮັບເງິນລາງວັນ ຈຳນວນ 25.000.000 ກີບ
ອັນດັບ 3 ຊີໄອທີ ໄດ້ຮັບເງິນລາງວັນ 10.000.000 ກີບ
ອັນດັບ 4 ນະຄອນຫຼວງ
ອັນດັບ 5 ເຫນືອ – ໃຕ້
ອັນດັບ 6 ວີເຊີນ
ອັນດັບ 7 ເຄເອັມທີ
ອັນດັບ 8 ລະຊະຕະ
ອັນດັບ 9 ອາສາ ພາວເວີ້
ອັນດັບ 10 ຈັນສີ
ອັນດັບ 11 ມາສດາ ຈີບີ
ອັນດັບ 12 ຊີທີເອ ພາວເວີ້້
ນອກຈາກນັ້ນ,ຍັງມີລາງວັນຜູ້ຍິງປະຕູສູງສຸດເປັນຂອງ ຈັນສະຫມອນ ພົມມະລີວົງ ຈາກ ເອັສທີທີ ຍິງໄດ້ 25ປະຕູ ໄດ້ຮັບຂັນລາງວັນ, ຜູ້ຮັກສາປະຕູດີເດັ່ນ ບຸນເພັງຂາວພູມີ ຈາກ ເບສະຫວັນ ລົງສະຫນາມ 12 ນັດ ໄດ້ຮັບຂັນລາງວັນ, ນັກກິລາດີເດັ່ນ ຄໍາຜາ ພິພັກຂະວົງ ຈາກ ເບສະຫວັນ ໄດ້ຮັບຂັນລາງວັນ ແລະ ຄູຝຶກດີເດັ່ນ ສົມພອນ ສໍາເພົານົນ ຈາກ ເບສະຫວັນ ໄດ້ຮັບຂັນລາງວັນ.
