ນັກສຳມະນາກອນ 40 ທ່ານ ໄດ້ຮັບຍົກລະດັບວຽກງານວິທະຍາສາດການກິລາ ຈາກໂຄງການຮ່ວມມືວິຊາການ ລາວ-ໄທ ໂດຍການຮ່ວມມືລະຫວ່າງກົມກິລາລະດັບສູງ ກະຊວງສຶກສາທິການ ແລະ ກິລາ ຮ່ວມກັບ ການກິລາແຫ່ງປະເທດໄທ ແລະ ອົງການ TICA ປະຈຳປະເທດໄທ (Project on Capacity Building for Sport Science on High performance Sport (Elite Sport) Development Monitor and Evaluation Phase) ທີ່ ສະຖາບັນກິລາ-ກາຍຍະກຳ ລະຫວ່າງວັນທີ 18 – 20 ມິຖຸນາ 2024.
ເມື່ອວັນທີ 18 ມິຖຸນາ 2024 ທີ່ສະຖາບັນກິລາ-ກາຍຍະກຳ (ສີເກີດ) ເມືອງຫາດຊາຍຟອງ ນະຄອນຫລວງວຽງຈັນ ໄດ້ມີການຝຶກອົບຮົມການທົບທວນ ແລະ ຕິດຕາມການຈັດຕັ້ງປະຕິບັດ ວຽກງານວິທະຍາສາດການກິລາ ໃນການຝຶກສອນຕົວຈິງ ພາຍໄຕ້ຂອບການຮ່ວມມືວິຊາການ ລາວ-ໄທ ດ້ານການພັດທະນາກິລາລະດັບສູງ ໄລຍະ 2 (2022-2024) ໃຫ້ກຽດເປັນວິທະຍາກອນຈາກອາຈານ ມະຫາວິທະຍາໄລຈຸລາລົງກອນ, ມະຫາວິທະຍາໄລກະເສດສາດ ແລະ ການກິລາແຫ່ງປະເທດໄທ, ມີນັກສຳມະນາກອນທີ່ເປັນຄູຝຶກ, ແພດ ແລະ ນັກກິລາ ຈາກສະຫະພັນກິລາແຫ່ງຊາດ, ສະຖາບັນກິລາ-ກາຍຍະກຳ ແລະ ສະໂມສອນກິລາ ເຂົ້າຮ່ວມທັງໝົດ 40 ທ່ານ ເປັນຍິງ 18 ທ່ານ.
ການອົບຮົມຄັ້ງນີ້ ແມ່ນໄດ້ມີການອົບຮົມວິທີການນຳໃຊ້ເທບຕິດແກ້ອາການຕ່າງໆຂອງນັກກິລາ ແລະ ການນວດໃຫ້ນັກກິລາ.
