ກົມກິລາລະດັບສູງ ຕ້ອນຮັບນັກສຶກສາຈາກສະຖາບັນກິລາ-ກາຍຍະກຳ ທີ່ມາທັດສະນາສຶກສາເກັບກຳຂໍ້ມູນ ແລະ ເປັນຄວາມຮູ້ດ້ານການສຶກສາ ເມື່ອວັນທີ 2 ກໍລະກົດ ຜ່ານມາ ທີ່ຫ້ອງປະຊຸມ ຄະນະກຳມະການໂອແລມປິກແຫ່ງຊາດລາວ. ໃຫ້ກຽດຕ້ອນຮັບ ແລະ ໃຫ້ຖ່າຍທອດຄວາມຮູ້ໃນຄັ້ງນີ້ ໂດຍ ທ່ານ ສີຈັນ ຈິດຕະປັນຍາ ຮອງຫົວຫນ້າກິລາລະດັບສູງ ກະຊວງສຶກສາທິການ ແລະ ກິລາ ແລະ ນຳພານັກສຶກສາມາທັດສະນະໂດຍ ທ່ານ ກິ່ງລັດຕະນະ ທອງສະຫມຸດ ຮອງຜູ້ອຳນວຍການສະຖາບັນກິລາ-ກາຍຍະກຳ ພ້ອມດ້ວຍຄູອາຈານ ແລະ ນັກສຶກສາ.
ໂອກາດດັ່ງກ່າວ ທ່ານ ສີຈັນ ຈິດຕະປັນຍາ ກໍ່ໄດ້ກ່າວຕ້ອນຮັບນັກສຶກສາທີ່ລົງມາທັດສະນະສຶກສາ ຢູ່ທີ່ກົມກິລາລະດັບສູງ ແລະ ມີຄວາມສົນໃຈໃນເລື່ອງບໍລິຫານການກິລາ ແລະ ການເຄື່ອນໄຫວກິລາທັງພາຍໃນ ແລະ ຕ່າງປະເທດ. ພ້ອມທັງຍັງມີຄວາມສົນໃຈ ແລະ ເອົາໃຈໃສ່ ກ່ຽວກັບນິຕິກຳຕ່າງໆ ທີ່ທາງກົມກິລາລະດັບສູງ ໄດ້ປະຕິບັດ ແລະ ເຜີຍແຜ່. ນອກຈາກນັ້ນ ທ່ານ ສີຈັນ ຈິດຕະປັນຍາ ຍັງໄດ້ຕອບຄຳຖາມ ທຸກຄຳຖາມທີ່ນັກສຶກສາຢາກຮູ້ແລະນຳໄປເຮັດບົດລາຍງານນຳອີກ.
ພາຍຫລັງສຳເລັດການຕ້ອນຮັບ ທາງກົມກິລາລະດັບສູງ ຍັງໄດ້ນຳພານັກສຶກສາລົງເກັບກຳຂໍ້ມູນກັບ 5 ພະແນກຂອງກົມ ປະກອບມີ ພະແນກບໍລິຫານ ແລະ ສັງລວມ, ພະແນກປະສານງານກິລາ, ພະແນກຈັດການແຂ່ງຂັນ, ພະແນກພັດທະນາກິລາ ແລະ ພະແນກກວດກາ, ຕິດຕາມ ແລະ ປະເມີນຜົນ.
