ກົມກິລາລະດັບສູງ ກະຊວງສຶກສາທິການ ແລະ ກິລາ ຈັດກອງປະຊຸມ ປະຈຳເດືອນ ເພື່ອລາຍງານສະພາບລວມຜ່ານມາ ແລະ ລາຍງານຄວາມຄືບຫນ້າກ່ຽວກັບວຽກງານນິຕິກຳ ແລະ ການກະກຽມເຂົ້າຮ່ວມກິລາໃນຮົ່ມ ແລະ ຕໍ່ສູ້ປ້ອງກັນໂຕອາຊີ ຄັ້ງທີ 6 ຢູ່ປະເທດໄທ.
ເມື່ອວັນທີ 28 ມິຖຸນາ 2024 ທີ່ຫ້ອງປະຊຸມ 304 ກົມກິລາລະດັບສູງ ກະຊວງສຶກສາທິການ ແລະ ກິລາ (ຕຶກເຈົ້າອະນຸວົງ) ໄດ້ມີການຈັດກອງປະຊຸມປະຈຳເດືອນ ຂື້ນ. ໃຫ້ກຽດເປັນປະທານໂດຍ ທ່ານ ແສງພອນ ພົນອາມາດ ຫົວຫນ້າກົມກິລາລະດັບສູງ ກະຊວງສຶກສາທິການ ແລະ ກິລາ, ທ່ານຮອງຫົວຫນ້າກົມ, ຫົວຫນ້າພະແນກ, ຮອງພະແນກ ແລະ ພະນັກງານ-ວິຊາການ ເຂົ້າຮ່ວມ.
ໂອກາດດັ່ງກ່າວ, ທ່ານ ແສງພອນ ພົນອາມາດ ກໍ່ໄດ້ກ່າວເຖີງສະພາບລວມອັນພົ້ນເດັ່ນໃນເດືອນຜ່ານມາ ແລະ ທິດທາງແຜນການເດືອນຕໍ່ຫນ້າ, ໂດຍສະເພາະ ການປຸກລະດົມຈິດໃຈພະນັກງານພາຍໃນກົມ ໃຫ້ປະຕິບັດລະບຽບວິໄນຂອງພະນັກງານລັດຢ່າງເຂັ້ມງວດ ແລະ ເປັນແບບຢ່າງທີ່ດີ. ນອກຈາກນັ້ນ, ທ່ານຍັງໃຫ້ຜູ້ຮັບຜິດຊອບວຽກງານໃນຕໍ່ຫນ້າ ຂື້ນລາຍງານກ່ຽວກັບນິຕິກຳ ແລະ ລາຍງານການກະກຽມເຂົ້າຮ່ວມກິລາໃນຮົ່ມ ແລະ ຕໍ່ສູ້ປ້ອງກັນໂຕອາຊີ ຄັ້ງທີ 6 ຢູ່ປະເທດໄທ.
