ກະຊວງສຶກສາທິການ ແລະ ກິລາ ຫຼື ສສກ ຫວນຄືນມູນເຊື້ອເຫດການສຳຄັນທາງປະຫວັດສາດຂອງຊາດ ເນື່ອງໃນໂອກາດສະເຫຼີມສະຫຼອງວັນສ້າງຕັ້ງກິລາ-ກາຍະກຳແຫ່ງຊາດລາວ ຄົບຮອບ 58 ປີ (13 ກໍລະກົດ 1966-13 ກໍລະກົດ 2024) ແລະ ວັນຄ້າຍວັນເກີດຂອງປະທານ ສຸພານຸວົງ ຄົບຮອບ 115 ປີ.
ພິທີປາຖະກະຖາເລົ່າມູນເຊື້ອຜົນງານຄັ້ງປະຫວັດສາດຂອງຊາດ ເນື່ອງໃນໂອກາດສະເຫຼີມສະຫຼອງ 2 ວັນສຳຄັນດັ່ງກ່າວ ໄດ້ຈັດຂຶ້ນ ເມື່ອວັນທີ 12 ກໍລະກົດ ຜ່ານມາ ທີ່ຫ້ອງການປະສານງານຄະນະກຳມະການໂອແລມປິກແຫ່ງຊາດລາວ ຫຼື ຄອລ ໃຫ້ກຽດເຂົ້າຮ່ວມ ແລະ ປາຖະກະຖາໂດຍ ທ່ານ ປອ ພູທອງ ແສງອາຄົມ ອະດີດລັດຖະມົນຕີ ປະຈຳສຳນັກງານນາຍົກລັດຖະມົນຕີ, ອະດີດປະທານຄະນະກຳມະການໂອແລມປິກແຫ່ງຊາດລາວ, ໃຫ້ກຽດເຂົ້າຮ່ວມຮັບຟັງໂດຍ ທ່ານ ຮສ.ປອ ພຸດ ສິມມາລາວົງ ລັດຖະມົນຕີ ກະຊວງສຶກສາທິການ ແລະ ກິລາ ທັງເປັນປະທານຄະນະກຳມະການໂອແລມປິກແຫ່ງຊາດລາວ ພ້ອມດ້ວຍບັນດາຫົວໜ້າ-ຮອງຫົວໜ້າກົມ, ສະຖາບັນ, ສູນ ແລະ ພະແນກ ຕະຫຼອດຮອດພະນັກງານທີ່ກ່ຽວຂ້ອງ ແລະ ນັກສຶກສາຢ່າງພ້ອມພຽງ.
ໂອກາດນີ້, ທ່ານ ປອ ພູທອງ ແສງອາຄົມ ກໍໄດ້ເລົ່າຄືນມູນເຊື້ອ 2 ວັນສຳຄັນທາງປະຫວັດສາດຂອງຊາດ ກໍຄື ວັນສ້າງຕັ້ງກິລາ-ກາຍະກຳແຫ່ງຊາດລາວ ຄົບຮອບ 58 ປີ (13 ກໍລະກົດ 1966-13 ກໍລະກົດ 2024) ແລະ ວັນຄ້າຍວັນເກີດຂອງປະທານ ສຸພານຸວົງ ຄົບຮອບ 115 ປີ ໂດຍສະເພາະເຫດການສຳຄັນຕ່າງໆໃນອະດີດ ທີ່ຜູ້ນຳລາວໃຫ້ຄວາມສຳຄັນໃນການອອກກຳລັງກາຍໃຫ້ສຸຂະພາບແຂງແຮງ ຄຽງຄູ່ກັບການປົກປັກຮັກສາ ແລະ ສ້າງສາພັດທະນາປະເທດຊາດ ຈົນສາມາດປົດປ່ອຍປະເທດຊາດ ຫຼຸດພົ້ນອອກຈາກແອກການປົກຄອງຂອງພວກລ່າເມືອງຂຶ້ນ ເຮັດໃຫ້ບ້ານເມືອງມີຄວາມສະຫງົບ ແລະ ມີການການພັດທະນາຢ່າງເຕີບໃຫຍ່ຂະຫຍາຍຕົວຈົນມາຮອດປັດຈຸບັນ.
ທ່ານ ປອ ພູທອງ ແສງອາຄົມ ກ່າວຕື່ມອີກວ່າ: ອີກເຫດການໜຶ່ງທີ່ສຳຄັນ ກ່ອນ ສປປ ລາວ ຈະໄດ້ຮັບກຽດເປັນເຈົ້າພາບ ຈັດງານກິລາຊີເກມ ຄັ້ງທີ 25 ປີ 2009 (ກິລາໃນຂົງເຂດອາຊຽນ) ມີຫຼາຍສິ່ງທີ່ທ້າທາຍ ໃນຄັ້ງນັ້ນ ພື້ນຖານໂຄງລ່າງ ສປປ ລາວ ກໍຍັງບໍ່ທັນມີຫຍັງເປັນຕົວເປັນຕົນ ເປັນບັນຫາຫຍຸ້ງຍາກ ຊຶ່ງຄະນະນຳຫຼາຍທ່ານກໍບໍ່ເຫັນດີໃຫ້ຈັດເທື່ອ ແຕ່ຂ້າພະເຈົ້າ ກໍພະຍາຍາມອະທິບາຍ ການເປັນເຈົ້າພາບຈັດແບບລຽບງ່າຍ ບໍ່ຈັດຍິ່ງໃຫຍ່ຄືກັບບັນດາປະເທດອື່ນ ທີ່ພັດທະນາກ່ອນເຮົາແລ້ວ ຊຶ່ງປະເທດໜຶ່ງສາມາດຈັດແຂ່ງຂັນໄດ້ 40 ກວ່າປະເພດກິລາ ແຕ່ພວກເຮົາມາເນັ້ນຈັດ 20 ຫຼື 30 ກວ່າປະເພດກິລາ ເພື່ອເປັນການປະຫຍັດງົບປະມານ ແລະ ເພີ່ນກໍເຫັນດີໃຫ້ຈັດ ຈຶ່ງໄດ້ມີການຂຶ້ນແຜນຊອກຫາແຫຼງທຶນ ໂດຍປະສານພົວພົນບັນດາປະເທດເພື່ອນມິດຂໍການສະໜັບສະໜູນພື້ນຖານໂຄງລ່າງ ແລະ ປະເທດຍີ່ປຸ່ນກໍໃຫ້ການຊ່ວຍເຫຼືອສ້າງສູນກິລາໃນຮົ່ມ ບູໂດເຊັນເຕີ, ສະໂມສອນກິລາໃນຮົ່ມ ບູຢອງ ແລະ ສະໂມສອນກິລາໃນຮົ່ມໂອແລມປາເຊຍ, ສ່ວນປະເທດບຣູໄນ ກໍຊ່ວຍສ້າງສະໂມສອນກິລາໃນຮົ່ມໂຮງຮຽນພອນສະຫວັນກິລາ-ກາຍະກຳ, ສສ ຫວຽດນາມ ຊ່ວຍສ້າງສູນຝຶກກິລາແຫ່ງຊາດ ທັງສອງຈຸດແມ່ນຢູ່ສີເກີດ, ຣາຊະອານາຈັກໄທ ກໍ່ສ້າງສູນກິລາໃນຮົ່ມບຶງຂະຫຍອງ ແລະ ສປ ຈີນ ກໍກໍ່ສ້າງສະໜາມກິລາແຫ່ງຊາດ ປະເພດກິລາຕ່າງໆ ຢູ່ຫຼັກ16 ຈຶ່ງເຮັດໃຫ້ ສປປ ລາວ ສາມາດສ້າງປະຫວັດສາດ ໜ້າໃໝ່ໃນວົງການກິລາອາຊຽນ ສາມາດຍາດໄດ້ 33 ຫຼຽນຄຳ, 25 ຫຼຽນເງິນ ແລະ 55 ຫຼຽນທອງ ຜົນງານທັງໝົດນີ້ ກໍຍ້ອນມາຈາກຄວາມເສຍສະຫຼະຂອງການນຳທຸກຂັ້ນ, ຄູຝຶກ ແລະ ນັກກິລາທຸກຄົນຊ່ວຍກັນເປັນນໍ້າໜຶ່ງໃຈດຽວທຸ້ມເທເຫື່ອແຮງ ແລະ ສະຕິປັນຍາເຂົ້າໃນການແຂ່ງຂັນໃນຄັ້ງນີ້.
ຫຼັງຈາກນັ້ນ, ທາງອະດີດການນຳກິລາລາວ ພ້ອມດ້ວຍ ຄະນະບໍລິຫານງານ ຄອລ ທັງອະດີດ ແລະ ປັດຈຸບັນ ຕະຫຼອດຮອດພະນັກງານ ແລະ ນັກສຶກສາ ກໍໄດ້ຮ່ວມກັນຖ່າຍຮູບທີ່ສະໜາມກິລາເຈົ້າອານຸວົງ ເພື່ອເປັນພາບທີ່ລະນຶກໄວ້ໃນຄວາມຊົງຈຳຕະຫຼອດໄປ ເພາະສະໜາມກິລາດັ່ງກ່າວ ຈະມີການປັບປຸງກໍ່ສ້າງໃໝ່ ຊຶ່ງຈະເລີ່ມລົງມືກໍ່ສ້າງໃນທ້າຍປີ 2024ນີ້.
