ກອງປະຊຸມດັ່ງກ່າວ ໃຫ້ກຽດເປັນປະທານຂອງ ທ່ານ ປອ ສຳລານ ພັນຄະວົງ ຮອງລັດຖະມົນຕີກະຊວງສຶກສາທິການ ແລະ ກິລາ, ທ່ານ ບຸນມີ ຈັນທະອຸດົມ ຫົວໜ້າກົມກວດກາ, ທ່ານ ອິນທະວົງ ມະນີທອງ ຮອງຫົວໜ້າກົມຈັດຕັ້ງ ແລະ ພະນັກງານ, ພ້ອມດ້ວຍຄະນະນຳ, ຮອງຫົວໜ້າກົມ, ຫົວໜ້າພະແນກ, ຮອງພະແນກ ແລະ ຄະນະບໍລິຫານງານ 3 ອົງການຈັດຕັ້ງມະຫາຊົນຂອງກົມກິລາລະດັບສູງ ເຂົ້າຮ່ວມ.
ສຳລັບ ຈຸດປະສົງ ແລະ ລະດັບຄາດໝາຍໃນກອງປະຊຸມຄັ້ງນີ້ ແມ່ນເພື່ອຕິດຕາມ, ຊຸກຍູ້ການປະຕິບັດມະຕິ, ຄໍາສັ່ງ, ການປະຕິບັດນະໂຍບາຍ, ບັນດານິຕິກຳຕ່າງໆ ຂອງຂັ້ນເທິງ ວາງອອກໃນແຕ່ລະໄລຍະ, ເພື່ອຕິດຕາມ, ຊຸກຍູ້ການປະຕິບັດພາລະບົດບາດ, ສິດ, ໜ້າທີ່, ແບບແຜນວິທີເຮັດວຽກ, ການສະກັດກັ້ນ ແລະ ແກ້ໄຂປະກົດການຫຍໍ້ທໍ້, ແບບແຜນການນໍາພາ, ແບບແຜນວິທີເຮັດວຽກ ແລະ ດໍາເນີນການປະເມີນ ການນຳພາຂອງຜູ້ບໍລິຫານການສຶກສາ ແລະ ກິລາ, ເພື່ອຕິດຕາມກວດກາການຄຸ້ມຄອງ ແລະ ນໍາໃຊ້ບັນດາແຫຼ່ງລາຍຮັບຕ່າງໆເຊັ່ນ: ລາຍຮັບດ້ານງົບປະມານຂອງ ລັດ, ຂອງໂຄງການຊ່ວຍເຫຼືອກູ້ຢືມ, ໂຄງການຊ່ວຍເຫຼືອລ້າ, ລາຍຮັບດ້ານວິຊາການ ແລະ ລາຍຮັບບຳລຸງການ ສຶກສານັບທັງການປະຕິບັດລະບຽບຫຼັກການດ້ານການເງິນ, ການຄຸ້ມຄອງ ແລະ ນໍາໃຊ້ພາຫະນະ, ວັດຖຸ ອຸປະກອນສ່ວນຕ່າງໆຂອງລັດ ແລະ ເພື່ອເປັນການກະຕຸກໃຫ້ແກ່ພະນັກງານ ໃນການປະຕິບັດໜ້າທີ່ວຽກງານ, ມີສະຕິ ແລະມີຄວາມຮັບຜິດຊອບຕໍ່ ໜ້າທີ່ວຽກງານທີ່ຖຶກມອບໝາຍ.
